எந்த நொடியில் என்னிதயம்

அவள் புள்ளி வைத்து
போட்ட கம்பிக் கோலத்தில்
என்னிதயமும் அடைப்பட்டதா ?
அவள் வீட்டுப் பூவை
பறித்தப் போது
என்னிதயமும் பறிபோனதா ?
அவள் மயிலிறகு தொலைத்து
தேடிய போது
என்னிதயமும் தொலைந்ததா ?
அவள் எழுதுகோலை
பல்லிடுக்கில் கடித்தப் போதே
என்னிதயமும் கடிபட்டதோ ?
அவள் காந்தப் பார்வைக்கு
கூடுதல் ஒளிவீச மைதீட்டிய போது
என்னிதயமும் ஒளிவீசியதோ ?
எப்படி இழந்தேன் என்னிதயத்தை
யாரேனும் காதலில்
முனைவர் பட்டம் பெற்றிருப்பின்
எந்த நொடியில் என்னிதயம்
களவாடப்பட்டதென சொல்லுங்கள்
அதை அவளுக்கு சொல்லவேண்டும்
அவளொரு கள்வனின் காதலியென்று
ஆம் நான் கள்வனே
அவள் இதயத்தை திருடியதால்...
         -- பிரவீணா தங்கராஜ் .